Салтак корныш ужатыме годым пелештыме мут

Поро Ош Кугу Юмо, Эр юмо, Эр суксо, Эрге пӱрышӧ, Шочынава, Илыш шочын, Мер юмо! Таче теве эргына-влакым мер ваке луктын колтышна, коштмаштышт тазалыкым пу, осал тушман деч пыдал, порылык дене мӧҥгеш пӧртылтен кондо!

Кава юмо, Ош кече ава, чыла тыйын кидыштет: шочшына-влакын волгыдо кечыжат тыйын кидыштет, кочшаш-йӱшаш кинде-шинчалжат, возын малыме вержат. Коштмаш корныштышт пиал дене коштыкто, чоныштым порылык дене ырыктен шого!

Тӱнямбал кугу юмо, Тӱнямбал кугу серлагыш! Таче эргына-влакым тӱнямбаке луктын колтена. Коштмаштыштат, Поро Юмо, поро сай тазалыкым пуэн шого! Еҥ осал тушманлан ит кудалте. Мо осалым шонат гынат, чыла шканышт лийже!

Шочынава, Мер Юмо, Пӱрышӧ Юмо! Могыр лулегым пуэнат, кап-кылымат пуэнат. Сай серлагышым, тазалыкым пуэн шого!

Кугу Серлагыш, сай серлаген коштыкто! Таза кап-кылан пӧртылын толышт, сурт-печым ончаш, марий калыкым пукшен-йўктен ончышаш пиал дене, ешым кучымо пиал дене, Курык кугызалан кумалшаш пиал дене пӧртыл толжо. Толеш гын, мамыкан комбетым шогалтен кумалына. Кӱрлӧ Пӱрышӧ, ит кӱрылтыктӧ! Пӱрышӧ Юмо, пӱрен ашне!

Поро Кугу Юмо, шочшемлан, эрге-влаклан пиалым, тазалыкым, серлагышым пуэн шого!

 

«Ош Сандалык ончылно» книга гыч.

 

Армийыште служитлыше верч пелештыме мут

Кугу Кугече кечын пелыштыме мут

Радинча – марийский праздник. Пелештыме мут

Вольыкым кÿтÿш лукмо годым Юмылан пелештыме мут

Пелештыме мут

#ЙӱлаТрадиция