А, йöратен лийын шого, Кугече Кугу Юмо! Порсын лÿҥгалтышет дене, илышым ылыштыме кечет дене, Кугече Кугу Юмын аваже, алал лийже!
А, таче эрдене яндар кап-кыл дене, яндар вургем дене, сурт еш кöргем дене эр ÿжара нöлталтме годым, ош солыкым налын, тичмаш кинде сукырым, ÿян эгерчым, ош туарам пыштен, пелештен шогышна. Модын лекмет дене куандарен, илыш корнынам виктарен шогаш йодына. Еш сурт ÿмбачын алал лийже, йöратен лийже, Кугече Кугу Юмо!
Сурт Юмо, йöратен лийын шого! Кугече Кугу Юмо дене ик ой-каҥашан лийын шогыза.
А, толын шогыза пырля пелештымашкына Тÿҥ Ош Кугу Юмо, Ош Кече Ава, Мер Юмо, Шочынава Юмо, Перке Юмо, Мланде Ава, Кугу Серлагыш, Агавайрем Юмо! Микол Юмо, Кÿдырчö Юмо, Волгенче Юмо, Мардеж Ава. Ешем ÿмбач, суртем ÿмбач, вольыкем ÿмбач, мÿкшем ÿмбач серлагыш лийын шогыжо. У’стембал тичмаш дене йывыртыктен шогыза. Сурт кöргö ешемлан сай, таза кап-кыл дене илаш, сурт-пече дене илаш, вÿта кöргö вольык дене илаш серлаген шогыза. Мÿй клатет дене йывыртыктен, серлаген шогыза. Мÿй саска пушет дене йывыртыктен, серлаген шогыза. Клат кöргö кинде перкет дене йывыртыктен шогыза, шондык кöргö ший-шöртньö надырет дене, тÿрлö тÿсан оксат дене йывыртыктен шогыза. Мо перкем йодын шогена — виктарыза. Алал лийже!
Сурт-печым осал тÿтан мардеж деч, осал тул деч, чыла осал деч аралыза, серлаген шогыза. Ваш-ваш лавыра шомакым кышкыме деч, осал сар деч, осал пычал-тар-шикш деч арален шогыза, серлагышым пуэн шогыза. Шым суксо-витньызыже, шым кечыже, Идалык Юмо, идалык Суксо, арня гыч арняш, ий гыч ийыш лишыл еҥ, ача-ава, ака-шÿжар, иза-шольо, родо-тукым, йолташ, пырля пашам ыштыше, тÿрлö йылман-тÿвыран калык дене келшен илаш серлаген шогыза.
Тичмаш чесет дене, Кугече Кугу Юмо, аралтышым, серлагышым, перкем йодын кумалына — ашеш толжо.
Серлагыш, аралтыш, перке лийже!
Пелештыме мутым «Марла календарь 2022» гыч налме.
Икмыняр ешартышым Эльвира Куклина пуртен.
Кугече – Кугу Кече (Великий День)
Методические рекомендации по проведению календарно-обрядового праздника КУГЕЧЕ (ПАСХА)
Радинча – марийский праздник. Пелештыме мут
Вольыкым кÿтÿш лукмо годым Юмылан пелештыме мут
