Шочмо йылмым, тӱвырам авай дене пырля арален кодена

Чынак, шочмо йылмым, калык тӱвырам ава-ача икшывылан шергакан кузык семын кучыктышаш, шӱм-чонышкыжо пыштышаш, уш-акылышкыже шыҥдарышаш. Тыге ме таче калык поянлыкнам арален коден да вияҥден кертына.

2023 ий 27 майыште «ИНТЕЛЛЕКТУАЛ» тӱвыра-увер рӱдерыште йоча пайрем гӱжлыш. «Авай, кече онча!» пайрем «Шочмо йылме авай дене пырля» проектын участникше-влаклан – 3-7 ияш йоча-влак ден аваштлан, тыгак тӱҥалтыш класслаште тунемше-влаклан пöлеклалте. Йочам аралыме тӱнямбал кече вашеш эртыш.

Палемдыман, проект кышкарыште 2022 ий 1 октябрь гыч 2023 ий 27 май йотке 10 еш «Авай дене пырля» школ-студийыш коштын. Тиде – ава да кажне гаяк еш гыч 2-3 йоча дене (кум-шым ияш да тӱҥалтыш класслаште тунемше). Ты пагытыште шочмо марий йылме дене занятий-влак эртеныт. Психолог пашам ыштен. «ЭтноМир» мастерской кышкарыште калык тӱвырам, йӱлам сӱретлен тунемыныт. Палыме еҥ-влак дене вашлийыныт.

Тыге «ИНТЕЛЛЕКТУАЛ» тӱвыра-увер рӱдер пелен умбакыжат «Авай дене пырля» школ-студий пашам ышташ тӱҥалеш. Тидлан у йöнат уло – «3D МУТЕРым» ыштыме.

Проект кышкарыштак «Марий еш пиал» республик кӱкшытан усталык конкурс лийын. Тушко 400 утла сылне деч сылне паша пурен. Кызыт нуным ончаш рӱдерыш интерактив выставкыш толаш лиеш.

А 27 майыште «Авай, кече онча!» йоча пайремыште шке мастарлыкыштым тӱрлӧ ийготан да тӱвыра-увер рӱдерын тӱрлӧ проектыштыже участвоватлыше ӱдыр-рвезе-влак ончыктеныт. Мутлан, «КӱслеКыл» усталык рӱдерын чолга еҥже-влак – аваж ден эргыже Татьяна ден Данил Анисовмыт, Алиса Ельсукова.

Программым вӱденыт «Марий Аниматор» у проектын мастар ӱдыр-рвезыже-влак Дарья Юрьева, Елена Семёнова, Александр Кузьминых, Талвий Абрамов. Нӧргӧ этноблогер-влак – Анна Александрова, Лиана Овчинникова, Софья Иванова-Ольховская, Софья Поворознюк – рольымат модыныт, мурымат муреныт.

Пайремыште йоча-влак муреныт, куштеныт, почеламутым лудыныт, модыныт. Кажныже тӱрлӧ пӧлек дене палемдалтын.

Пайремын йолташыже-влак: «Саскавий» мари ӱдырамаш ушем, Ресторан «Мари» — Марий Сийгудо, амалкалче Владимир Аптулаев («МариАлко» кевыт), амалкалче Наталья Венина.

Пайремыште йоча ден аваштым уна-влак саламленыт. Тиде – Марий Элысе туныктыш да шанче министрын алмаштышыже Валентина Гаврилова, Тӱвыра, печать да калык-влакын пашашт шотышто министерствын пашаеҥже Вячеслав Комаров, «Саскавий» мари ÿдырамаш ушемым вуйлатыше Людмила Кошкина да ты ушем вуйверын еҥже Любовь Камелтдинова.

«Шочмо йылме авай дене пырля» проектым «ИНТЕЛЛЕКТУАЛ» тӱвыра-увер рӱдер илышыш шыҥдара. Проект коммерческий огыл организаций-влакын регионысо 2022 ийын грант конкурсыштыжо сеҥен. Конкурсым «Добрая Марий Эл» мер организаций ден Президент грант-влак фонд эртарат.

«Авай дене пырля!» школ-студий умбакыжат пашам ышта. Тиде проектым вияҥдаш илыш йодеш да, эн тӱҥжӧ, тудо еҥ-влаклан кӱлеш.

Кугу-кугу тау!
Большое-большое спасибо!